O Concello de Lugo anunciou que procederá á tala de dous tilos na Avenida Ramón Ferreiro (á altura dos números 14 e 21), tras recibir un informe técnico que determina o “risco elevado de caída ou ruptura” de ambos os exemplares, comprometendo a seguridade viaria e peonil na zona.
O informe, elaborado polos enxeñeiros da empresa concesionaria do mantemento de parques e xardíns, detalla as razóns específicas para cada árbore: o primeiro tilo, situado fronte á oficina da Policía Nacional do DNI, experimentou un “notable incremento da súa inclinación” desde 2018, proxectándose “perigosamente” sobre a calzada. Pola súa banda, o segundo tilo sufriu un sinistro en maio de 2023 que lle provocou unha grave perda de cortiza, desencadeando un proceso de apodrecemento interno que compromete de maneira crítica a súa estabilidade estrutural.
O Goberno local confirmou que, co fin de preservar o carácter verde da Avenida Ramón Ferreiro e cumprir co plan municipal de arborado, ambos os exemplares serán repostos. A nova plantación realizarase durante a próxima primavera, despois de agardar a que se complete a desactivación biolóxica dos sistemas radiculares orixinais.
