Axentes da Policía Local e da Policía Nacional detiveron en Lugo a un home que circulaba sen carné e que fuxiu a gran velocidade tras recibir a orde de alto dos axentes. O suceso tivo lugar na noite do pasado martes, cando unha patrulla detectou unha manobra sospeitosa na rúa Tui. Ao comprobar a matrícula, verificaron que o coche tiña a ITV caducada e que o seu titular carecía de permiso de condución en vigor.
O condutor fixo caso omiso das indicacións policiais e iniciou unha fuxida temeraria polas rúas da cidade, chegando a incorporarse á N-6 en dirección A Coruña, onde alcanzou velocidades superiores aos 150 quilómetros por hora. Finalmente, introduciuse nun centro de lavado de vehículos no polígono do Ceao, onde foi cercado polos axentes, pero descendeu do coche e continuou a fuxida a pé.
No vehículo abandonado localizáronse máis de 100 gramos de diversas drogas, así como documentación a nome do sospeitoso, un vello coñecido das forzas de seguridade por intervencións anteriores. O coche, que presentaba graves deficiencias como a ausencia de cinto de seguridade no asento do copiloto e compartimentos manipulados, foi precintado e sometido a unha ITV extraordinaria.
Durante o operativo tamén se inspeccionou outro vehículo sospeitoso nas inmediacións, cuxo titular conta con antecedentes. Os axentes incautáronlle un pasamontañas, unha bolsa con balíns e un teléfono móbil do que non puido xustificar a súa procedencia. A súa presenza na zona tampouco foi explicada de maneira coherente.
Horas máis tarde, xa ao día seguinte, confirmouse a detención do condutor fuxido por parte da Policía Nacional. No momento do arresto, o individuo mostrou unha actitude violenta e pouco colaboradora. As autoridades instruíron dilixencias por varios delitos e infraccións administrativas, entre elas circular sen carné, coa ITV caducada, desobedecer os axentes e tenencia de drogas.
