A Audiencia Provincial de Lugo acollerá o vindeiro luns o xuízo contra un profesor do campus lucense acusado de desviar 9.500 euros dun convenio de investigación entre a Universidade de Santiago de Compostela (USC) e unha empresa irlandesa.

Segundo o escrito de acusación, o procesado, doutor con dedicación completa na área de Enxeñaría Agroforestal, tiña a responsabilidade de autorizar os gastos vinculados a un proxecto de certificación de bosques de carballos en Galicia.

Entre 2016 e 2018, simulou contratos de asesoramento cunha empresa da que el mesmo era administrador e presentou facturas falsas, ademais de cargar gastos persoais á partida universitaria que xestionaba. A cantidade desviada foi posteriormente reintegrada.

A Fiscalía considera que estes feitos constitúen delitos de malversación, negociacións prohibidas a funcionarios e falsidade documental. Por iso, solicita para o acusado unha pena dun ano e once meses de prisión, así como a inhabilitación especial para cargo ou emprego público.

O xuízo terá lugar o luns na sede xudicial da capital lucense.