O queixo Don Crisanto, da Denominación de Orixe Protexida (DOP) San Simón da Costa, elaborado pola queixería Crisanto en Vilalba, foi elixido mellor queixo de España en 2025 nos premios Alimentos de España que concede o Ministerio de Agricultura. Este recoñecemento, publicado este luns no BOE, outórgase desde esta edición de forma anual e destaca os produtos de maior calidade do país.
Ademais de acadar o galardón ao mellor queixo madurado de vaca, Don Crisanto obtivo tamén a mellor puntuación global entre todas as categorías, polo que recibe o premio especial ao mellor queixo do ano en España. Trátase dun novo fito para o sector queixeiro galego, que continúa posicionándose a nivel nacional pola súa excelencia e tradición artesanal.
Nesta edición, participaron 135 mostras de todo o Estado, valoradas por expertos a través de análises físico-químicas, microbiolóxicas e sensoriais. O galardón supón un importante impulso para a visibilidade dos queixos galegos no mercado e encaixa co obxectivo do Ministerio de promocionar a calidade e a diversidade dos produtos agroalimentarios baixo o selo Alimentos de España.
