O Partido Popular de Lugo acusou ao tenente de alcalde nacionalista, Rubén Arroxo, de aproveitar a ausencia do rexedor da cidade para asinar, “sacándoos dun caixón”, cinco decretos nos que se autorizaba o pago de máis de 60.000 euros en sancións por verteduras contaminantes en distintos puntos do municipio.
Segundo explicou a portavoz do PPdeG, Elena Candia, tres deses expedientes sancionadores eran por verteduras e incumprimentos ambientais labores entre os anos 2021 e 2023, “coincidindo coa etapa na que Miguel Fernández tiña a responsabilidade directa da área de Medio Ambiente”.
Ademais, engadiu que os outros dous eran reclamacións do canon de control de verteduras. “En todos os casos, a falta de actuación e resposta ante estes expedientes provocou que se tramitasen por vía executiva, o que supón maiores custos para o Concello, incluíndo intereses de demora”, indicou.
O PP pediu ao goberno local aclaracións sobre os motivos polos que estes expedientes “acaban en vía executiva e as razóns polas que se esperou a que o alcalde estivese de viaxe para que Arroxo sacase estes decretos dun caixón e decidise o seu abono”. Así, afirmou que no Concello hai dous gobernos, “e este tipo de comportamentos non é a primeira vez que pasan”.
Para os populares, o sucedido “é outro exemplo máis do incumprimento do alcalde Miguel Fernández, que non tomou medidas para evitar os danos ambientais cando tiña a responsabilidade”. Candia sostivo que dous expedientes sancionadores son derivados de verteduras ilegais procedentes de lixiviados dun antigo vertedoiro clausurado e que afectaron a canle do río Penalba (Teixeiro); e outro unha vertedura directa de augas residuais procedentes dun aliviadoiro dunha estación de bombeo municipal a un regato en Meilán.
A estas súmanse dúas reclamacións do canon de control de verteduras pola urbanización Bellavista en Esperante, correspondentes aos anos 2021 e 2022.
Candia completou a súa queixa sobre “incumprimentos” do alcalde falando da peonalización do centro. “Miguel Fernández dixo que as obras estarían acabadas o 15 de maio na rúa Montevideo e seguen sen estar completas, polo que a súa palabra vale pouco ou nada”, concluíu.
