Vilalba acolle esta fin de semana unha nova edición, e xa van vinte e nove, da súa senlleira Festa do Queixo de San Simón. Este ano, seguindo a estrutura de programa dos últimos anos, ademais dos postos dos queixeiros e queixeiras, contará con obradoiros de cociña, catas comentadas, concertos, animación musical e un innovador ‘Desafío Queixeiro’. Esa última actividade consistirá nunha cata interactiva a cargo da Eurepean Cheese Route, roteiro do queixo europeo no que vén de entrar recentemente o Concello de Vilalba.
Segundo nos explica a concelleira Paula Vigo, haberá uns 75 postos, nos que ademais das queixerías haberá propostas de artesanía, alimentación, etc. No que respecta ás queixerías, contarase con 32, delas 7 son de Vilalba da D.O.P. San Simón da Costa. O resto chegadas de Galicia pero tamén de puntos da península como Cádiz, Baleares ou Valladolid. E de fóra, unha será de Portugal.
PROGRAMACIÓN
A apertura do recinto feiral será o sábado 5 na Praza da Constitución ás 11:00 h. e ás 12:30 h. terán lugar dúas catas comentadas. Por un lado, unha de queixo San Simón’ a cargo de Salomé Beiroa; e por outro unha de tarta de queixo da man de Eduardo Balsa.
Ás 13:00 h., e no mesmo lugar indicado, haberá un Obradoiro de Cociña Infantil para que a cativada coñeza as posibilidades culinarias do Queixo de San Simón.
Xa pola tarde, o esperado pregón que terá como protagonista ao actor e humorista Carlos Blanco, e a entrega de premios da proba deportiva de BTT. Pero ollo, a participación de Blanco nesta Festa do Queixo de San Simón non rematará coas verbas dedicadas ao saboroso queixo afumado. Ás 20:30 h. ofrecerá un dos seus monólogos no Auditorio Municipal de Vilalba (entradas en www.entradasvilalba.es)
O remate á xornada chegará da man de dúas formacións musicais galegas moi de moda, De Ninghures e Fillas de Cassandra. A Praza de Santa María acollerá un concerto de ‘De Ninghures’ ás 22:00 h. e outro de ‘Fillas de Cassandra’ ás 23:00 h. A concelleira subliña que “este ano apostamos pola xuventude e por iso programamos estes concertos, pensando neles”.
O domingo 6 de abril a apertura do recinto feiral será ás 10:00 h. e ás 12:30 haberá un concerto da Banda de Gaitas Mato Vizoso na Praza da Constitución. Xa pola tarde, rematando a programación, de 17:00 a 20:00 h. baile no Centro Cultural co dúo ‘Hora Bruja’.
