A titular do Xulgado de Instrución número 1 de Vilalba decidiu deixar en liberdade ao home detido nese municipio lucense como suposto autor de 25 delitos de danos en inmobles e vehículos en diferentes puntos da provincia, ao mostrar a súa intención de facerse cargo do custo dos danos e someterse a tratamento.
O Tribunal Superior de Xustiza de Galicia (TSXG) informou de que o detido, que pasou a mañá deste xoves a disposición xudicial, admitiu “polo menos parte” dos feitos investigados. Ninguén solicitou a medida de prisión provisional para o detido o pasado martes, ante o cal a titular do xulgado que estaba de garda acordou a súa posta en liberdade. Non entanto, tras manter unha entrevista cos forenses, decidiron chamar ao servizo de urxencias sanitarias 061 para proceder ao seu traslado a un centro sanitario.
A Garda Civil atribúelle danos en vehículos, aos que supostamente causou raiaduras, cortou válvulas de pneumáticos, cortou circuítos de dirección, de freos e de sistemas ABS, e rompeu espellos retrovisores. Entre os vehículos danados hai un microbús escolar, que facía a chamada ruta de Muimenta. Fontes da investigación tamén confirmaron que o detido ten antecedentes por violencia de xénero.
