O secretario xeral do PSdeG, José Ramón Gómez Besteiro, rexeitou sinalar un candidato para a Alcaldía de Lugo tras o falecemento o pasado sábado de Paula Alvarellos, xa que será algo que se decidirá na propia cidade, “entre o partido e o grupo municipal”. Así respondeu ao ser preguntado este mércores en Santiago, na rolda de prensa para presentar o XV Congreso Nacional do PSdeG, que se celebrará a fin de semana, sobre se a dirección autonómica ten algún nome preferido para asumir o bastón de mando en Lugo.
O partido deberá escoller a un dos membros do grupo municipal, no que está o que fora número dous da lista que en 2023 liderou Lara Méndez, Miguel Fernández, quen xa soou para substituír á agora deputada autonómica. Outra posibilidade pasa pola secretaria xeral do PSOE local, Ana González Abelleira. Neste contexto, Besteiro insistiu en que será “unha decisión acaída para todos”, sexa cal for a que adopten entre o partido en Lugo e o grupo municipal. “Esa é a que todos imos entender e respectar”, resolveu.
O secretario xeral do PSdeG lembrou que este mércores é o primeiro día sen loito oficial en Lugo tras o falecemento de Paula Alvarellos o pasado sábado, a raíz do infarto que sufriu a noite do venres. Besteiro arrincou a rolda de prensa cun recordo a unha alcaldesa que coñeceu nos ámbitos “profesional, político e profesional” e que deixa “unha profunda pegada” no partido. Tal e como destacou, Alvarellos tiña un “compromiso” tanto coa súa cidade como con Galicia e deixa un “baleiro moi difícil, por non dicir imposible, de encher”. Así, avanzou que a figura de Alvarellos estará “moi presente” no XV Congreso Nacional.
