Os senadores do PP lucense rexistraron este venres unha pregunta na Cámara Alta dirixida ao Goberno central para saber os motivos polos que o Ministerio de Transportes ampliou o prazo de execución para rehabilitar 60 quilómetros da A-6, ao seu paso pola provincia de Lugo, de 18 a 42 meses. Neste sentido, José Manuel Barreiro, José Manuel Balseiro e Juan Serrano reclamaron unha explicación ao Executivo, ao que acusaron de “discriminar e abandonar” á provincia de Lugo “unha vez máis” en materia de infraestruturas.
“Afecta os veciños nos seus desprazamentos do día a día, aos autónomos, transportistas e lastra o desenvolvemento e a competitividade da provincia”, sinalaron os populares nunha nota de prensa. Con todo, tamén se referiron á postura do BNG, formación da que afearon que en Madrid “continúe apoiando a Sánchez, que marxina á provincia de Lugo”. Así mesmo, aseguraron que o BNG é “ninguneado” por Sánchez e por “o resto de socios” do Goberno.
