A portavoz do Grupo Municipal Popular de Lugo, Elena Candia, presentou unha batería de 50 medidas para que sexan incluídas nos orzamentos para este ano. Estas propostas, que dividiu en cinco bloques, abarcan todas as áreas de goberno e centralízanse no capítulo de investimentos “que é o que realmente mira o cidadán, porque os gastos correntes é algo fixo”. Candia aproveitou a ocasión para reclamar a PSOE e BNG a presentación dos orzamentos do 2025 “dos que nada sabemos aínda e que tiñan que estar presentados en outubro de 2024”, indicou.
Así mesmo, pediu que elaboren uns orzamentos “realistas”, xa que “ata a data só está executado, formalizado ou en proceso preto dun 17 % dos 14 millóns que se anunciaron o ano pasado no capítulo de investimentos”. Puxo neste caso como exemplo a remodelación da protectora ou os hortos ecolóxicos. As propostas do PP lugués están divididas territorialmente entre a zona norte, o centro e o sur da cidade e a elas engádenselles as propostas dirixidas especialmente ás parroquias e tamén outras transversais e xenéricas.
Candia recoñeceu que moitas destas propostas que presentan “non son novas e foron levadas a pleno nalgunha ocasión para a súa aprobación, pero como cremos firmemente na súa necesidade seguimos insistindo”. Así, para a zona norte da cidade de Lugo propón como medida principal un plan piloto de rehabilitación para o barrio Feijoo e A Milagrosa “no que se aborden de forma transversal as obras de peonalización”, que considera que afectan a contorna e “iso non se está coidando”.
Ademais, reclaman a instalación de cámaras de videovixilancia tanto “en zonas con especial sensibilidade no barrio da Milagrosa” como nos polígonos industriais. Piden para esta zona precisamente a apertura dunha delegación da Policía Local, un aparcadoiro seguro, a creación de dotacións para o coidado dos fillos dos traballadores ou a renovación de tubaxes, debido a un problema “que se puxo de relevo nun informe que quedou nun caixón”. A nivel de infraestruturas máis puntuais solicitan que se cubra o campo de petanca no Parque Frigsa e o parque infantil Fonte dos Ranchos, a mellora da beirarrúa na rúa Virxe da Soidade das Gándaras ou a creación dun centro intergeneracional no barrio do Castiñeiro.
Para a zona centro, unha das propostas estrela é un plan de accesibilidade para conectar o barrio da Estación coa zona centro de Lugo, “buscando integrar a nova estación Intermodal na vida da cidade”, para iso propoñen “ir pensando” nunha forma de salvar a pendente que hai na rúa que os une, “porque hai varias alternativas que están a funcionar noutras cidades”. A mellora das instalacións da praza de abastos, un plan de limpeza e restauración do parque Rosalía ou a creación dun aparcadoiro disuasorio na rúa Castelao, así como aparcadoiro disuasorio no Carme son outras das ideas que presentan.
Para o relanzamento da zona centro propoñen a creación dun consorcio de dinamización do Centro histórico, con posible sede no edificio do Vicerreitorado, para preservar o patrimonio e dinamizar a actividade económica. A iso suman un plan de apoio ao pequeno comercio, “especialmente ao afectado polas obras do centro e creación dunha plataforma loxística”; ou chegar a acordos cos propietarios da OJE para crear un espazo deportivo e cultural no centro. Insisten tamén na vixilancia dos monumentos.
Para a zona sur de Lugo céntranse en medidas máis puntuais, encabezadas pola construción dun aparcadoiro en Fontiñas e outro subterráneo en Augas Férreas, ademais da necesidade de realizar unha mellora e humanización da entrada de Lugo pola Fervedoira. Reclaman tamén avanzar no proxecto da Unión do parque do Miño e do Rato, a zona de baño, a recuperación do anfiteatro do campus, a reparación integral da vía Fermín Rivera ou cubrir unha das pistas de tenis do Pombal. Tamén propoñen a mellora da Carballeira de Fingoi ou a revitalización do barrio da Ponte. Reclaman tamén a apertura da rúa Vila Verde, “non como unha solución para a falta de aparcadoiro, pero se para mellorar a mobilidade na zona”.
No capítulo de achegas na zona rural, estas pasan polo saneamento, abastecemento, plan de rozas, impulso aos centros sociais ou a elaboración dun plan fiscal para paliar a subida do IBI para incentivar as actividades do rural. Entre outras ideas propoñen un servizo de baleirado de fosas sépticas, “que non ten porque ser gratuíto”, ou puntos de conciliación para nenos e persoas maiores. Finalmente, Candia concluíu a listaxe de 50 medidas con outras quince de carácter transversal, entre as que destacou o reforzo dos persoais de persoal municipais ou a elaboración dun Plan de Turismo.
Tamén lembrou outras necesidades como crear un plan de saúde mental especialmente para escolares, unha oficina de asesoramento para ocupacións ilegais de vivendas, unha oficina do maior ou un servizo de atención e coidado de menores a domicilio. En tema infraestruturas, lembrou tamén a necesidade de reabrir o parque López Mella, a eliminación de tapóns urbanísticos ou a construción de novas instalacións deportivas. A portavoz popular concluíu dicindo que non se trata de facer un investimento grande, “trátase de empezar coa redacción dos proxectos, ademais algunhas medidas non requiren de desembolsos importantes de diñeiro, son máis ben xestos cos veciños”.
