Axentes da Policía Local de Lugo desprazáronse, na mañá do pasado martes, a unha vivenda tras a chamada dunha viandante que alertaba de que nun balcón da primeira planta dun edificio do norte da cidade había un neno asomado, sobre unha cadeira, “con risco de caer cara á vía pública”. Á súa chegada non observaron a presenza do pequeno. Ao acceder ao edificio, a que dixo ser a nai do menor manifestou saber que “o seu fillo estivera no balcón, subido a unha cadeira, contando coches” mentres ela se atopaba no domicilio. Os efectivos comunicaron a Servizos Sociais o ocorrido “por se se entendese necesaria algunha actuación complementaria”.
Por outra banda, realizaron varias actuacións vinculadas co auxilio de persoas. O pasado mércores, acompañaron á súa casa a unha muller de 97 anos que vive soa e estaba na rúa desorientada, a cal xa fora atendida “en máis ocasións” polo mesmo motivo e por iso, deron aviso tamén aos Servizos Sociais. O xoves, requiriron a presenza dunha ambulancia para atender a un home que se atopaba durmindo na rúa, “posiblemente ebrio”,quen foi trasladado ao HULA debido a unhas feridas que presentaba na cara. Así mesmo, axudaron a incorporar a unha muller de 64 anos e outra de 86 que se caeron en senllas vivendas.
Noutra orde de cousas, o sábado, os axentes procederon ao desaloxo dunha nai e unha filla do seu domicilio tras desprenderse o chan e unha parte do falso teito no interior dun establecemento público “sen que resultase ningunha persoa lesionada”. Ademais, o xoves, a Policía local de Lugo denunciou a un home polas molestias que estaba a causar ao resto da veciñanza co “volume da música, os golpes e os berros” procedentes do seu piso, así como “por negarse a abrir a porta e a facilitar a súa identidade aos axentes en todas as ocasións que chamaron ao timbre e golpearon a porta de entrada”. Do mesmo xeito, os efectivos iniciaron investigacións sobre outro inmoble para pescudar se pode ser dedicado a vivenda ou se está arrendando “de forma irregular”. Fixérono tras as protestas dos veciños tamén polo volume da música.
