O secretario xeral do PSdeG na provincia de Lugo, José Tomei, e a deputada no Congreso por Lugo, Patricia Otero, defenderon este venres na capital lucense o investimento de “1.000 millóns de euros en infraestruturas” realizada polo Goberno central na provincia desde 2019 e destacaron, en relación a algunhas delas, o éxito do sistema de balizas antinéboa instaladas na A-8, que permitiu que a vía só estivese pechada, precisaron, “14 horas ao ano en 2023” fronte á “media de 700 horas” anuais que o estaba anteriormente.

“Este Goberno demostrou con feitos o seu compromiso coa provincia de Lugo en materia de infraestruturas”, declarou José Tomei, o primeiro en tomar a palabra, para acto seguido puntualizar que da devandita partida orzamentaria 238 millóns han ido destinados á “renovación, mellora e mantemento das estradas“.

Tras a breve intervención inicial do secretario xeral do PSdeG na provincia de Lugo, a deputada Patricia Otero, integrante tamén da Comisión de Transportes e Mobilidade Sustentable, pasou a desagregar as principais actuacións acometidas, ao seu xuízo, polo Executivo central na provincia para saír ao paso, dixo, de “a campaña de mentiras e bulos” posta en marcha polo PP lucense en relación ás infraestruturas de competencia estatal.

Otero, que estivo acompañada tamén durante a súa intervención polo senador socialista por Lugo, César Mogo; e pola deputada no Parlamento de Galicia, Lara Méndez; subliñou a mobilización realizada por parte do Goberno de Pedro Sánchez de “máis de 38 millóns de euros para a renovación do firme” da A-6 e revelou os datos correspondentes ao número de horas que a autovía A-8 permaneceu pechada en 2023 á altura do Alto de Ou Fiouco, en Mondoñedo, tras a implantación por parte do Goberno do sistema intelixente de balizas antinéboa como resultado dun investimento de “874.000 euros”