O goberno autonómico non pecha a porta a novas incorporacións no trazado do Camiño de Santiago. Así se deduce das declaracións do conselleiro de Cultura e Turismo, Román Rodríguez, logo de ser preguntado pola ruta por Muros e Noia. O responsable da Xunta explicou que toda consideración pasa pola “base histórica e cultural”, interesante perspectiva de rematar con éxito a investigación acerca da Vía Künig.
Despois de advertir de que “o Xacobeo non é un capricho”, Rodríguez dixo que “todas as propostas son benvidas” e convidou a que “toda Galicia se implique”. Así as cousas, a Xunta contemplaría novas incorporacións ao trazado oficial baixo a condición de respectar “a autenticidade histórica” do Camiño.
A Vía Künig é unha variante do Camiño Francés que vira por Pedrafita cara As Nogais, Becerreá, Baralla e O Corgo, para pasar pola cidade de Lugo. Esta alternativa conta con abundante evidencia documental e toma o nome da guía do século XV escrita polo monxe alemán Künig, editada en cinco ocasións entre 1495 e 1521.
