Unha ‘quedada’ de coches o pasado fin de semana no polígono das Gándaras de Lugo saldouse con 6 condutores denunciados por dar positivo nas probas de alcoholemia e por condución neglixente e temeraria.
Segundo informou a Policía Local, esta reunión de condutores tivo lugar na noite do sábado, e concertouse mediante redes sociais. Ao ter coñecemento da ‘quedada’, a Policía Local despregou un dispositivo de vixilancia con indicativos policiais rotulados e outros camuflados.
Con motivo dese dispositivo identificouse e denunciou a un condutor que sufrira unha saída da vía nunha das rúas do polígono e que, ao ser sometido á proba de alcoholemia, arroxou un resultado de 0,65 mg/l. O seu vehículo foi inmobilizado.
Por outra banda, foron detectados outros tres condutores que deron positivo no test de alcoholemia, cuns resultados de 0,35, 0,48 e 0,51 mg/l respectivamente. Ademais das correspondentes sancións e retirada de puntos, os coches tamén foron inmobilizados.
A Policía Local informou tamén da identificación e denuncia doutro condutor, por condución temeraria (enfróntase a sanción de 500 euros e perda de 6 puntos) e outro máis por condución neglixente (proposto para sanción de 200 euros).
Por outra banda, nos diferentes filtros de seguridade viaria establecidos pola Policía durante o fin de semana, tramitáronse denuncias contra catro condutores que circulaba sen ter o carné en vigor, contra dous condutores que deron positivo no test de alcoholemia superando o límite penal, contra outros 6 condutores por alcoholemias administrativas, e 4 condutores que deron positivo no test de drogas.
Así mesmo, foron propostos para sanción 11 condutores que circulaban coa ITV sen pasar no prazo correspondente, e outros 6 condutores que carecían do seguro obrigatorio.
