Un home resultou ferido tras sufrir queimaduras cando trataba de acender unha caldeira de leña situada no garaxe da súa vivenda, na parroquia de San Xulián de Veiga, no municipio lucense de Sarria.
Segundo informou o 112 Galicia, o ferido trataba de acender a caldeira cando o lume lle saltou á roupa, o que lle provocou diversas queimaduras no corpo.
Foi un particular quen, ao fío das 19.20 horas deste sábado, solicitaba asistencia para un home que se queimou. Así, ao ter coñecemento dos feitos, os operadores do 112 mobilizaron aos Bombeiros de Sarria e aos servizos sanitarios, así como á Policía Local, á Garda Civil e á Agrupación de Voluntarios de Protección Civil.
Unha vez extinguido o lume, os bombeiros procederon a arrefriar a zona e confirmaron á central de emerxencias que se queimaron bolsas e diversos materiais que había ao redor da caldeira. Ademais, indicaron que o home fora trasladado.
