A Policía Local de Lugo tivo coñecemento a través de redes sociais dunha ‘quedada’ de vehículos no aparcadoiro da Universidade, próximo ao Pazo Provincial de Deportes, na que detectaron a uns 120 participantes.
No dispositivo policial, despregado o 23 de decembro, formaron parte efectivos do Grupo Operativo Nocturno da Policía Local de Lugo, con vehículos rotulados e camuflados que se infiltraron nesta ‘quedada‘.
Así, efectuáronse diferentes denuncias a varios condutores por condución neglixente; por circular cun escape ineficaz; por realizar no vehículo “unha reforma de importancia sen autorización; por circular sen presentar a ITV no prazo debido; e por circular por zona peonil.
Ademais, nas probas da alcoholemia e drogas realizadas detectáronse tres condutores que arroxaron resultados positivos. O primeiro, 0,46 mg/l; o segundo, 0,44 mg/l; e o terceiro, 0,36 mg/l. Todos eles foron sancionados con 500 euros de multa e a retirada de catro puntos do permiso de condución.
No transcurso deste dispositivo tamén se procedeu á localización de dous vehículos sobre os que pesaba mandato de procura e captura por embargo, sendo trasladados ao depósito municipal. Así mesmo, sancionaron con 900 euros a unha persoa que ouriñaba na vía pública.
OUTROS CONTROIS
Por outra banda, durante a madrugada do 24 e 25 de decembro, efectivos da Policía Local de Lugo estableceron diversos controis de alcoholemia e drogas en vías do centro urbano.
