A Confederación Intersindical Galega (CIG) acusou este martes en Lugo ás administracións públicas de “consentir a esclavización das condicións laborais” das traballadoras do sector da limpeza da provincia, en folga desde o pasado 16 de outubro.
Así se manifestou, no marco dunha nova concentración organizada polo sindicato en solidariedade coas profesionais, o secretario xeral da CIG, Paulo Carril, quen afeou ás administracións –“principais clientes”, dixo, “da patronal”– o feito de non actuar de oficio para “esixir o cumprimento do salario mínimo interprofesional” no convenio colectivo do sector.
“Resulta lamentable que as administracións estean a permitir a unha patronal, ASPEL, chea de empresas madrileñas, que veñan estender a pobreza e a escravización das condicións de traballo”, denunciou Carril, antes de advertir de que a negociación nas provincias de Ourense e Pontevedra podería levar a que “aumenten as mobilizacións”.
“O movemento demóstrase andando. Nós non queremos declaracións, queremos accións claras e decididas”, agregou o secretario xeral da CIG, quen anunciou a presentación dunha reclamación colectiva ante o Comité Europeo de Dereitos Sociais para esixir o cumprimento da Carta Social Europea e o respecto do salario mínimo nun convenio colectivo caducado en decembro de 2021.
Tras 58 días en folga indefinida, as traballadoras do sector da limpeza de edificios e locais da provincia de Lugo volveron a mobilizarse fronte ao edificio multiusos da Xunta, de onde arrincou unha numerosa concentración que concluíu ante a sede da Confederación de Empresarios de Lugo (CEL).
SEGUNDA REUNIÓN COA PATRONAL
Esta nova mobilización do sector, organizada ao redor da caravana reivindicativa estacionada desde o 20 de novembro fronte ao edificio da Xunta e símbolo xa da protesta, tivo lugar na xornada previa á celebración dunha nova reunión de mediación entre patronal e sindicatos, prevista para este mércores.
Tras un primeiro encontro celebrado o 4 de decembro e resolto sen avances significativos, a parte social confía agora en que a patronal “cambie a súa postura inamovible”.
“Temos enfronte a unha patronal absolutamente despreciable que quere seguir deixando ao sector da limpeza como está actualmente, na máis absoluta precariedade”, declarou, en relación ás negociacións, a responsable de CIG-Servizos na provincia de Lugo, Asunción Castiñeira.
“As traballadoras son un exemplo de loita, resistencia e dignidade e están dispostas a seguir ata onde faga falta”, engadiu Castiñeira, para acto seguido afirmar que non existe “un plan B” na folla de ruta prevista polas profesionais do sector xa que “a mobilización é o único camiño para tentar sacar o convenio adiante”.
A recollida de firmas en apoio das traballadoras da limpeza cóntanse, explicaron desde a CIG, “por miles e miles” e as mostras de solidariedade da cidadanía coa causa do sector, apuntan desde o sindicato, “está a ser masivas”.
