A muller de 73 anos que o pasado venres foi acoitelada por un veciño de Samos continúa grave e na unidade de coidados intensivos do hospital de Lugo, segundo confirman este luns fontes sanitarias. O presunto autor dos feitos, de 49 anos, ingresou o domingo en prisión provisional, comunicada e sen fianza investigado por un delito de asasinato a un home, de 82, e por tentativa de homicidio á muller deste, que segue na UCI.
A ferida presentaba lesións graves por arma branca no pescozo e no tórax. Ao lugar desprazáronse o helicóptero do 061 con base en Ourense, así como o médico e a ambulancia da zona. Dos feitos tívose constancia pasadas as 8.00 da mañá. Segundo o 112, un particular alertou de que unha persoa fora apuñalada na parroquia de San Mamede do Couto, no lugar de Lamas. Ata alí trasladáronse os servizos sanitarios, ademais de efectivos da Garda Civil que procederon á detención do presunto autor dos feitos.
