A presidenta do PP da provincia de Lugo, Elena Candia, puxo en valor a importancia do apoio dos lucenses para a vitoria de Alberto Núñez Feijóo nas eleccións xerais do pasado domingo.
Así o sinalou durante a reunión da xunta directiva provincial dos ‘populares’, onde Candia subliñou que Lugo foi a provincia con máis respaldo ao proxecto de Feijóo, ao superar o 50 % do apoio ao PP, pasando en sete puntos porcentuais a media galega e en case 17 a media española.
“Lugo apoiou masivamente outra vez ao PP”, reivindicou, destacando os máis de 98.100 votos recibidos, 29.575 máis. “A lista do PP foi a gañadora en 63 dos 67 concellos da provincia, é dicir, no 94 %”, engadiu, segundo recolle o PP nun comunicado.
Candia indicou que o PP foi a forza política que máis creceu en apoio, superando ao PSOE e o BNG en máis de 39.000 e 81.000 votos, respectivamente. Na cidade de Lugo tamén obtivo o mellor resultado das sete grandes cidades de Galicia, con case o 47 % dos votos.
Grazas a iso, o PP obtivo tres deputados (Francisco Conde, Jaime De Olano e Cristina Abades) e tres senadores (José Manuel Barreiro, María José Gómez e Juan Serrano) por Lugo, aos que Elena Candia desexoulles sorte, instándoos a que traballen en beneficio da provincia e dos lucenses.
