O secretario xeral do PSdeG, Valentín González Formoso, fixo un chamamento en Lugo ao voto xuventil fronte ás opcións de dereita que “tratan á mocidade como borregos”.
Así o manifestou nun acto este domingo dirixido aos mozos, coa participación das Xuventudes Socialistas, no que tamén participou a cabeza de lista ao Congreso pola provincia, José Ramón Gómez Besteiro, e a alcaldesa, Lara Méndez.
Dende alí, Formoso pediulle aos máis novos o apoio para un PSOE que nos seus 144 anos de historia fixo “bandeira do avance social” da mocidade.
Fronte aos socialistas, situou a unha dereita que cada vez que goberna “coarta a capacidade formativa subindo as taxas universitarias e reducindo o orzamento en bolsas“.
Sinalou tamén que “quen non concibe á mocidade como persoas libres tamén sexualmente non merece gobernar o país, e emprazou á mocidade galega a reflexionar sobre a relevancia da próxima convocatoria electoral, “probablemente a data máis importante dos últimos 40 anos deste país”.
Nestes comicicios, destacou, os galegos tamén decidirán entre “consolidar os avances sociais” da man dun PSOE que “representa á maioría deste país que se chama Galicia e que se chama España” ou “volver 40 anos atrás, ao branco e negro e dúas formacións para nada europeístas” e “incorporar o retroceso histórico ao goberno”.
“INFLUENCERS DA DEMOCRACIA”
Pola súa banda, a cabeza de lista ao Congreso pola provincia de Lugo, José Ramón Gómez Besteiro, subliñou despois deste encontro a reflexión da mocidade galega de “ser verdadeiros ‘influencers’ da democracia”.
Así, aplaudiu o seu compromiso na defensa dos valores e liberdades fronte a “unha vida pasada” dunha España “peor” con “ditaduras e censuras que non lembraban” porque eles non naceran.
