A provincia de Lugo afronta este mércores a cuarta xornada de folga do metal co IPC real como principal demanda da clase traballadora e escollo para que os seus representantes cheguen a un acordo coa patronal.

O conflito do sector na provincia, composto por uns 5.000 profesionais do ámbito siderometal e outros 2.000 do comercio do metal, leva tres xornadas de paros que foron “en aumento”, segundo os sindicatos, que consideran que a patronal lles “toma o pelo” tras a última reunión, na que rexeitou asumir ese “IPC real” que esixen os traballadores.

O último encontro entre as partes terminou sen acordo despois de que a parte empresarial ofrecese ás organizacións sindicais pasar de 500 a 700 euros os atrasos de 2022. Tamén admitiu a patronal, segundo informou un portavoz de CC.OO., os incrementos futuros a IPC real “ano a ano”, pero “sen atrasos”, escollo que impediu a desconvocatoria dos paros.

Nas tres xornadas de folga anteriores, os piquetes informativos foron protagonistas nos polígonos de Lugo cidade e tamén noutras localidades como Monforte e Sarria, e centos de traballadores mobilízanse para seguir esixindo un convenio “digno”. Ademais deste mércores, hai novas datas de folga fixadas para o venres 2 de xuño e os días 6, 7 e 8 de xuño e os sindicatos avisan de que o seguinte paso é o paro de carácter indefinido.