A agrupación do PSOE de Lugo presentou unha denuncia ante a Xunta Electoral por un suposto caso de ‘carretaxe’ de votos nun asilo de Lugo.
Tal e como informaron nas súas propias redes sociais, a agrupación faise eco dunha información adiantada por eldiario.es na que se afirma que monxas dun asilo de Lugo foron fotografadas introducindo a papeleta no peto dos anciáns aos que levaban a votar.
A agrupación socialista lembra que un xulgado de Lugo xa ditaminou en 2017 que nese centro exercíase ‘carretaxe‘, aínda que o auto foi arquivado ao considerarse que os feitos “non encaixaban con ningún ilícito delituoso”.
DENUNCIA PPdeG
Por outra banda, o Partido Popular denunciou ante a xunta electoral de zona de Monforte de Lemos a utilización de medios audiovisuais da Deputación de Lugo por parte do seu presidente e candidato do PSOE á alcaldía de Monforte de Lemos, José Tomé, para cubrir a súa votación nun colexio electoral da localidade lucense.
Segundo a denuncia presentada ante a xunta electoral, o Servizo de Audivisuais da Deputación de Lugo (TIC) “non só acudiu a cubrir” a votación do candidato socialista, algo que, destacan os populares, “sen dúbida houbo de motivar o oportuno desprazamento de persoal”, senón que “ademais publicouno nas distintas redes sociais“, entre elas en Twitter.
