As centrais sindicais de CC.OO., CSIF e CIG emitiron este mércores unha nota de prensa conxunta para denunciar “actitudes intimidatorias” dalgún dos responsables de UXT na Deputación de Lugo. Así, criticaron “a postura de UXT da Deputación de Lugo, que está a dar amparo a actitudes intimidatorias de presunto acoso e ataques á dignidade de traballadoras desta institución por parte dalgún dos seus representantes sindicais”.
“Este sindicato está a demostrar que non só non condenan estes actos, senón que apoia e ampara a quen presuntamente os comete“, din os sindicatos, que solicitaron a semana pasada unha reunión urxente da Xunta de Persoal e, afirman, o seu presidente, de UXT, “nin sequera se molestou en convocala”.
CC.OO., CSIF e CIG entenden que o Goberno Provincial “tamén é responsable, xa que este mesmo representante de UXT protagonizou feitos similares no pasado, dos que a Administración ten constancia e non tomou ningunha determinación ao respecto“.
