O Boletín Oficial da Provincia de Lugo (BOP) publicou este martes a convocatoria e as bases da cuarta edición dos premios ‘Lugo Cambia ao Turismo Lucense’, ‘…E para comer’, ‘Lugo á Gastronomía Lucense’ e ‘Turismo Sostible’, co obxectivo de recoñecer a excelencia do turismo e da gastronomía da provincia.
Segundo trasladou a Deputación de Lugo nun comunicado, os interesados poden presentar as súas candidaturas a partir deste mércores e ata o día 31 de xullo na sede electrónica da institución. Así, poden presentarse persoas físicas ou xurídicas, institucións e entidades públicas ou privadas, asociacións e colectivos sen ánimo de lucro, de ámbito local, autonómico, nacional ou internacional que destaquen nalgunha do tres modalidades e teñan repercusión positiva no turismo ou na gastronomía a nivel provincial ou unha zona específica.
Deste xeito, as candidaturas poderán formularse a título individual ou por unha terceira persoa se conta co consentimento expreso da persoa candidata. O xurado estará composto polos representantes do Consello Provincial de Turismo. Así, na valoración das candidaturas terase en conta a achega da iniciativa ao desenvolvemento turístico, a singularidade da proposta e a repercusión positiva sobre a imaxe de Lugo.
Os galardóns, de carácter honorífico, que serán entregados o 27 de setembro nun acto público coincidindo co Día Mundial do Turismo, teñen como finalidade “apoiar, pór en valor e dar visibilidade ao traballo e a calidade do sector turístico e hostaleiro da provincia”.
