A Deputación de Lugo sinalou nun comunicado que máis de 2.650 persoas fixeron en Semana Santa, entre o día 1 de abril e o 9, as súas rutas fluviais pola Ribeira Sacra.
A institución indicou que esta cifra supera á doutras tempadas nestes mesmos días festivos” e apuntou que as embarcacións viaxaron “completas en case todas as viaxes”. Así, sinalaron unha das novidades, a inclusión das rutas en itinerarios programados por axencias de viaxes.
Deste xeito, o perfil predominante foi nacional, sobre todo procedente de Asturias, País Vasco e Madrid, sendo tamén relevante a afluencia de persoas doutros puntos da provincia de Lugo e do resto de Galicia. Ademais, para a maioría de viaxeiros “foi a primeira vez que vivía esta experiencia turística”.
Nesta liña, a Deputación indicou que os datos evidencian “unha boa previsión para o resto deste mes, contando xa cun 70% de ocupación”, a través das reservas feitas. Así, precisou que para o conxunto da tempada, que se prolonga ata decembro, “xa hai máis de 12.000 reservas”.
RUTAS
No caso da ruta fluvial Canón do Sil funcionan dúas travesías cunha capacidade total de 159 prazas, distribuídas en 107 no catamarán Mencía e 52 no monocasco Canón do Sil. Pola súa banda, a ruta fluvial Cabo do Mundo conta cunha capacidade total de 63 viaxeiros. As persoas interesadas en realizar as rutas poden adquirir os seus billetes en reservas.rutasembalses.es.
