A secretaria xeral do PPdeG, Paula Prado, mostrou este domingo o seu apoio ao candidato popular á Alcaldía do municipio lucense de Cervantes, Óscar Fernández, do que destacou as súas “novas ideas de ilusión e renovación” para a localidade.
Así mesmo, subliñou a importancia de que o candidato xa formase parte da lista do PP nas municipais de 2019 para “coñecer o funcionamento interno da corporación municipal”, así como para “intesificar os contactos cos veciños antes de dar o salto á Alcaldía”.
Nunha xornada de posta en valor do castro de Santa María de Cervantes, Prado tamén destacou que o candidato popular “está namorado de Cervantes” e, como bombeiro forestal, “sabe o que son e gústanlle os retos”. “A xente da Montaña lucense sabe que pode confiar en nós e por iso aquí estamos a conseguir atraer cada vez a máis persoas ao noso proxecto, un proxecto construído entre todos”, subliñou.
Pola súa banda, Óscar Fernandez comprometeuse a “pór en valor” o traballo dos colectivos veciñais, aos que trasladou o seu apoio para “continuar desenvolvendo actividades sociais” como elemento dinamizador do pobo.
