O Xulgado de Instrución número 1 de Lugo, en funcións de garda, deixou en liberdade, pero investigada por un delito contra a saúde pública, á muller detida o luns por tráfico de drogas. O outro apresado, un home, foi liberado tras pasar por dependencias da Policía Nacional.
No marco desta operación foron incautados 3,5 gramos de droga –á espera de confirmación de peso e da análise de pureza– e 105 euros en efectivo.
As detencións, segundo informan fontes xudiciais, producíronse na tarde do luns. Ambos foron interceptados momentos despois de realizar un intercambio de diñeiro e estupefacientes.
Os axentes observaron a unha muller nun vehículo que se puxo en contacto cun viandante. Este último subiuse ao coche e, tras compartir un breve traxecto, o home saíu tras realizar o intercambio.
Así, o home foi interceptado cun total de 35 dose de heroína do intercambio que acababa de facer no automóbil, polo que foi detido. A Policía tamén apresou á muller, á que se lle interveu o diñeiro que, supostamente, proviña da actividade ilícita.
Segundo explica a Policía Nacional, a muller dedicábase a transportar as sustancias estupefacientes á cidade para distribuílas aos vendedores, que son os que finalmente as facían chegar aos consumidores finais.
