A portavoz socialista da Deputación de Lugo, Pilar García Porto, pediu á Xunta de Galicia que “deixe de buscar escusas” e sente a negociar o convenio colectivo dos bombeiros do Consorcio Provincial de Lugo para a prestación do servizo contra incendios e salvamento, así como o cumprimento da sentenza do Tribunal Supremo para conseguir fixar os postos de traballo.
Nun comunicado, o ente provincial criticou que o Goberno galego “leva moito tempo demorando a negociación sobre diversas cuestións introducidas polos representantes dos bombeiros na proposta de acordo do convenio”.
“E cando por fin arrincou o proceso, deixou plantada á mesa negociadora o pasado luns”, criticou García Porto, que asegurou que a Xunta non acudiu á cita convocada polos comités de empresa e coa Deputación. Unha actitude que, ao seu xuízo, “demostra desconsideración e falta de respecto cara ao persoal e cara á institución provincial”.
Así, Pilar García Porto indicou que o delegado territorial do Executivo autonómico en Lugo, Javier Arias, “mente para tratar de escusarse” xa que o presidente provincial, José Tomei, que preside o Consorcio, “si que propuxo, por escrito, unha reunión previa coa Administración autonómica para abordar a proposta dos traballadores”.
“Reclamamos á Xunta que non atrase máis a negociación. Se ten algún interese en dilatar o proceso, terá que explicar por que”, engadiu a deputada, que mostrou a “total vontade de acordo” da Deputación.
