A Confederación de Empresarios de Lugo (CEL) reivindica para a provincia “un plan de emerxencias estratéxico” a nivel de infraestruturas, despois da focha na estrada N-642, en Burela, e os problemas derivados do derrube do viaduto de Ou Castro na A-6, moi preto de Pedrafita do Cebreiro.
O secretario xeral da CEL, Jaime López, esgrimiu que “non se pode falar só de perdas nas empresas”, pois “á fin e ao cabo as perdas nas empresas significan perdas para a cidadanía”. Neste contexto, o dirixente da patronal lucense non esconde que “as administracións teñen que poñerse deberes, tanto unhas como outras porque aquí non hai cores políticas”.
É por iso que sinalou que “Lugo necesita un plan de emerxencias estratéxico” a nivel de infraestruturas. “Estamos sen ferrocarril, están a facerse obras importantes na súa mellora e na súa actualización pero é un proceso lento, as estradas están como están e somos a única provincia sen autoridade portuaria propia”, lamenta.
“Temos unha situación moi feble desde o punto de vista das infraestruturas, cunha situación que se complica tamén polos problemas climáticos que provoca que, nestes momentos, a provincia estea desconectada por todas as súas estradas“, razoa. Refírese a o ocorrido na Mariña, coa focha na estrada nacional 642, e fixo especial fincapé en “o fundamental” desta comarca para o PIB provincial.
López expresou que esa “é a única nacional” na costa por “non dispor dunha autovía que conecte con Ferrolterra, coa Coruña ou dando continuidade á autovía do Cantábrico”, protestou. “As empresas da Mariña teñen un trastorno fundamental co tema do transporte e os cidadáns en xeral porque non podemos esquecer que aí está o hospital de Burela”, advertiu.
Por parte da patronal de Lugo púxose de manifesto que: “É fundamental tomar medidas urxentes para potenciar ese equilibrio territorial que necesita a provincia porque por transporte somos un nexo de unión coa Meseta, e isto trae dificultades tamén a Galicia, non só a Lugo”.
A Xunta CENSURA O “LAMENTABLE” ESTADO
Tamén o delegado da Xunta en Lugo, Javier Arias, afirmou que o “lamentable” estado das infraestruturas estatais “frea o progreso económico e social da provincia”. Arias xulgou que a derriba ocorrida na N-642 en Burela “completa o programa ruinoso dunhas comunicacións impropias deste século neste país”.
