A candidata do PP á Alcaldía de Lugo, Elena Candia, anunciou que, se consegue o bastón de mando, creará unha Concellaría de Maiores e que fará do Concello unha administración “máis accesible e cun trato personalizado”.
A través dun comunicado tras reunirse coa Asociación de Xubilados e Pensionistas de Lugo, a popular destaca á terceira idade como un “colectivo estratéxico para o futuro da economía” da cidade, polo que aposta por “darlle voz” para “desenvolver programas de dinamización económica ou de humanización”.
“Estamos en débeda con eles e é a nosa obrigación escoitalos e ter en conta as súas opinións, preocupacións e gustos co obxecto de satisfacer, na medida do posible, as súas demandas”, proclamou.
Elena Candia tamén prometeu cambiar o funcionamento da administración para facela “máis accesible”. Entre as medidas que adoptará, está eliminar a cita previa e potenciar a modalidade presencial “para aquelas persoas que prefiran o contacto directo”.
Nesta liña, comprometeuse a simplificar os documentos municipais como resolucións, comunicacións oficiais e trámites.
De igual modo, a candidata do PP compartiu cos pensionistas a súa preocupación pola soidade dos maiores e pola lista de espera no Servizo de Axuda non Fogar (SAF), entre outros asuntos.
