O Grupo Socialista levará ao pleno da Deputación de Lugo unha iniciativa para solicitarlle á Xunta que articule un “plan de choque” para a atención primaria da provincia, co obxectivo de que este servizo sexa “de calidade” e chegue “ao conxunto dos lucenses, con independencia do seu lugar de residencia ou da súa idade”.
Esta moción, que se debaterá no pleno do martes, reclamará tamén ao Goberno galego que poña fin á “política de recortes de persoal” e “adopte as medidas necesarias para repor con moita brevidade o persoal nos servizos de medicina de familia, pediatría e persoal sanitario”.
Ademais, os socialistas esixen que se “atenda ás reclamacións dos doentes e ás organizacións profesionais á hora de deseñar o modelo de atención de urxencias pediátricas“, para evitar que a “falta de atención nos centros de saúde se traduza logo no colapso dos centros hospitalarios” polas patoloxías respiratorias propias do inverno.
Segundo o PSdeG-PSOE de Lugo, que goberna a Deputación xunto co BNG (polo que, previsiblemente, a iniciativa sairá adiante), a falta de profesionais na provincia “afecta aproximadamente ao 80 por cento dos municipios”.
