O Partido Popular da provincia de Lugo replicou este martes ao secretario provincial socialista, e presidente da Deputación, José Tomé, que o proxecto de Orzamentos Xerais do Estado para o próximo ano é “claramente lesivo” para a provincia.

Dixérono despois de que Tomé Roca asegurase que, coas contas par 2023, Pedro Sánchez “segue cumprindo con Galicia e coa provincia de Lugo, como fai desde 2018″ e sinalase que a provincia recibirá o próximo ano máis do triplo de fondos que nos últimos cinco anos de Mariano Rajoy á fronte do Goberno central.

“Ou José Tomé vive nunha realidade paralela ou pretende enganar os lucenses no que se refire ao proxecto de orzamentos do Estado para 2023”, afirmaron os populares, que consideran que estas contas “esquecen as grandes infraestruturas que necesita a provincia, tanto de ferrocarril como en canto a autovías” e “non dan resposta ás necesidades da industria lucense”.