A presidenta de Federación de ANPAS de Centros de Ensino Público de Lugo (Fapacel), Isabel Calvete, afeou ao presidente do PP, Alberto Núñez Feijóo, que propoña a gratuidade dos libros de texto a nivel estatal cando el foi quen “eliminou” esta medida en Galicia.
En declaracións aos medio este martes, a responsable das anpas luguesas denunciou que o inicio de curso na provincia está marcado pola “confusión” e o “caos”, especialmente, á hora de facerse cos libros de texto.
“Estabamos desconcertados sobre o feito de sacar o currículo de infantil cando xa estaban os libros na imprenta”, incidiu Calvete, que tamén pide explicacións á Xunta polo programa Educación Dixital Galego (EDIXGAL), que “funciona nalgúns centros e crea confusión porque nalgunhas partes están a pedir libros para algún curso” que ten este sistema.
“Está a pedirse ás familias que compren libros e isto provoca desconcerto e enfado entre as familias porque se teñen o EDIXGAL non teñen por que comprar libros. Cando un colexio se acolle a este programa, as familias dese curso non teñen dereito a solicitar bolsas”, protestou.
Neste sentido, reivindicou “un ensino gratuíto e non facer o desembolso que se fai en libros de texto”, recalcou a presidenta de FAPACEL, que censurou que Feijóo faga súa unha medida que eliminou desde a Presidencia da Xunta.
“Aquí (Galicia) había un sistema de gratuidade de libros de texto que ata que o eliminaron, non pararon. E agora parece ser a bandeira de Feijoo, esa gratuidade de libros. Por suposto que queremos a gratuidade dos libros e do ensino público para todos os nenos e nenas”, aseverou.
