A Policía Local de Lugo interceptou o pasado martes a un motorista que circulaba sen carné, xa que nunca o obtivo, do mesmo xeito que non levaba as placas de matrículas visibles. Tampouco tiña seguro obrigatorio nin pasara a inspección técnica periódica.
O ciclomotor foi parado na confluencia das rúas Río Sil e Otero Pedrayo. Así, efectuáronse as pertinentes denuncias administrativas, con dilixencias por un suposto delito contra a seguridade viaria. O vehículo foi inmobilizado.
Por outra banda, foi detectada unha condución irregular polo Paseo dos Estudantes. O condutor arroxou senllas alcoholemias positivas de 0,75 e 0,70 mg/l, polo que se instrúen dilixencias por un suposto delito contra a seguridade viaria por procedemento de xuízo rápido.
