O delegado do Goberno en Galicia, José Miñones, instou a circular pola A-6, para chegar a Pedrafita, en horas de pouca concentración de vehículos, ao ser preguntado polas retencións que se están producindo tras a caída do viaduto, á vez que defendeu as medidas postas en marcha polo Executivo central.
Nun acto na Coruña, e a preguntas dos xornalistas, manifestou que “todo o mundo era coñecedor da complicación que ten non contar con ese viaduto”. “Xa advertimos que o tráfico ía ser complicado”, insistiu Miñones, quen incidiu en que as medidas postas en marcha “funcionaron”. En canto ás retencións, vinculounas tamén co verán e as festividades.
Por iso, recomendou aos condutores utilizar vías alternativas e “espaciar” a viaxe de forma que se utilice este traxecto nas horas de menor concentración de coches. “Fixemos o que está na nosa man”, insistiu sobre as medidas postas en marcha, citando a primeira alternativa que foi reducir o tránsito “a través da autovía en dobre sentido”.
“E para outubro tentar que non se teña que pasar por Pedrafita, que se poida utilizar o túnel”, apostilou coincidindo cun encontro con nenos saharauís.
