O Concello de Xermade emitiu un bando onde prohibe encher piscinas, a rega e o lavado de coches, polo escaso caudal que presentan os mananciais.

O alcalde, Roberto García Pernas, constatou estas restricións que xustifica porque “os mananciais baixaron moito e escasea a auga”. “Non é que esteamos en risco extremo, de momento”, matizou. “Os mananciais van moi baixos. Estamos con pozos bombeando para os depósitos. Hai que ser prudente e ter coidado para que non haxa unha escaseza total”, expresou.

Neste sentido, García Pernas advertiu que, de persistir a “seca, a cousa pode ser crítica para a maioría dos municipios”. “Hai a algúns veciños que se lle secaron os pozos e achegámoslle auga co coche de bombeiros, auga da traída municipal para paliar ese problema”, apunta. En concreto, son “dous veciños”, aínda que previu que “proximamente haberá máis porque os mananciais están a baixar tanto que quedan sen auga nos pozos”.

Xermade é outro municipio da provincia de Lugo que impón as restricións ao consumo do ben líquido, como ocorre en Ferreira de Pantón, Taboada ou Monterroso, entre outros.