A Garda Civil abriu unha investigación contra un veciño de Friol, que ademais fora axente deste mesmo corpo, por supostas ameazas a outras dúas persoas e por posuír no seu domicilio varias armas “non rexistradas”.

Segundo fontes do Instituto Armado, o ex garda civil proferiría ameazas, portando unha escopeta, a varios veciños por un tema “de lindes”. En definitiva, tratábase dunha discusión sobre terras.

Os feitos producíronse o pasado martes, coa intervención policial que posteriormente acudía ao domicilio do investigado, onde se lle acharon “varias armas non rexistradas”.

É por iso que se lle investiga por estas dúas razóns, por un delito de ameazas e outro por posesión ilícita de armas. Ademais, de acordo coas mesmas fontes, este veciño protagonizara outros altercados no municipio de Friol.