O alcalde de Pedrafita, José Luís Raposo, reclamou que se “solucione” e que se “solucione ben” a situación derivada do derrube producido no viaduto da A-6, que este xoves rexistrou un novo desprendemento que se suma ao de fai máis dunha semana. Así, reclamou “garantías” e “responsabilidade”.
En resposta a Europa Press, o rexedor desta localidade limítrofe da provincia de Lugo restou importancia á afectación do tráfico no seu concello, que pode supor “15 minutos” na saída de Galicia, pero sostivo que se demostrou que a edificación foi un “desastre”.
Raposo evita pronunciarse sobre se a solución é a demolición total da construción, iniciada en 1997 durante o Goberno de José María Aznar, inaugurada no ano 2000 e concluída definitivamente no ano 2002. “Doutores ten a igrexa”, sinalou.
No entanto, observou que, á vista do ocorrido, “posiblemente teña un defecto de construción” e unha “cimentación non suficiente”. “Que lles pregunten a quen o construíron“, manifestou. Raposo, preguntado por se considera que deben realizarse unha investigación xudicial, evitou concretar este extremo e remitiu ás indagacións que “se están facendo”. Así, advertiu de que puido ter “consecuencias moi gordas” e considerou que “ten que haber un pouco de responsabilidade”.
CRÍTICAS AO TRAZADO
Raposo tamén lembrou as críticas que se expresaron no seu momento e a falta de alternativa pola estrada nacional cando se solapou coa autovía. “Hai que estudar moito esas cousas cando se toman decisións, o que as tomou, que dea explicacións”, aseverou.
Así as cousas, reclamou que “se solucione e soluciónese ben”. “Que a solución definitiva teña garantías para que non volva pasar”, apuntou, aínda que restou importancia á afectación do tráfico. Aínda que poida ser “unha molestia” que teñan que pasar por núcleo urbano, quixo ver o positivo de que “deixe algún beneficio” para a economía local.
“Entre todo temos que convivir, outra solución non hai”, concluíu o rexedor de Pedratifa, quen destacou que as melloras na travesía que se demandaron, foron acometidas con “urxencia”: “É o que hai”.
