Unha muller resultou ferida ao recibir o impacto do carriño de bebé que levaba baleiro nese momento despois de ser este golpeado por un vehículo nun paso de peóns en Lugo. Segundo informou a Policía Local de Lugo, sobre as 15,00 horas deste pasado martes un equipo de Atestados instruíu dilixencias por un accidente de circulación ocorrido na Rúa das Fontes.
As mesmas fontes policiais relataron que neste sinistro un vehículo golpeara un coche de bebé baleiro, que levaba unha muller cando cruzaba por un paso de peóns. Ao chocar o vehículo contra o carriño de bebé, este desprazouse e impactou coa peatona, o que lle causou feridas que, puntualizan as mesmas fontes policiais, “non revisten gravidade”.
Finalmente, a muller foi trasladada por unha ambulancia do 061 ao Hospital Universitario Lucus Augusti (HULA) de Lugo para recibir atención sanitaria.
DENUNCIADO UN MENOR DE 14 ANOS
A Policía Local de Lugo instruíu dilixencias por un delito contra a seguridade viaria en relación a un menor de 14 anos por chocar co vehículo dun familiar con dous estacionados. Segundo relatou a Policía Local de Lugo, na tarde do pasado 23 de abril un equipo de Atestados trasladouse á rúa Río Parga porque se produciu un accidente de tráfico.
Os axentes desprazados comprobaron que un mozo de 14 anos accedera ao interior dun vehículo propiedade dun familiar para retirar un obxecto, “pero púxoo en marcha, acendeuno e baixou a panca de freo de man”, momento no que o turismo se desprazou cara adiante e chocou contra outro estacionado, destacan as mesmas fontes.
Acto seguido, segundo o relato policial, o menor accionou a marcha atrás e provocou o desprazamento do vehículo cara atrás e chocou contra outro tamén estacionado, debido ao que se rexistraron danos materiais. Os axentes localizaron aos pais do mozo e, en compañía da súa nai, trasladáronse a dependencias policiais onde se instruíron dilixencias por delito contra a seguridade viaria por carecer de autorización administrativa.
CONDUTOR SEN CARNÉ
Por outra banda, na mañá deste pasado martes unha patrulla da Unidade Territorial de Policía de Barrio detectou que un vehículo que saía do Banco de Alimentos do Ceao realizara “unha manobra estraña”, indica a Policía Local, polo que procederon a paralo.
Deste xeito, os axentes actuantes, a través das bases de datos policiais, constataron que o condutor carece de permiso de condución por non obtelo nunca. Por iso, foi trasladado á Unidade de Atestados, que instruíu dilixencias por delito contra a seguridade viaria na modalidade de xuízo rápido.
