A Deputación de Lugo abriu este martes e ata o 2 de maio o prazo para que entidades sen ánimo de lucro poidan solicitar axudas para desenvolver actuacións e proxectos vinculado ao medioambiente e ao rural que impulsen as reservas das biosferas Terras do Miño e Os Ancares Lucenses e Montes de Cervantes, Navia e Becerreá.
O Boletín Oficial da Provincia (BOP) publicou este luns a convocatoria, que prevé un orzamento total de 83.000 euros. Toda a información pode consultarse na web https://www.deputacionlugo.gal/gl/temas/medioambiente/subvencionsrrbb
Trátase dunha iniciativa que inclúe dúas liñas de actuación: unha dotada de 45.000 euros para a reserva Terras do Miño e unha segunda, por 38.000 euros, para os Ancares Lucenses. A Deputación outorgará ás entidades beneficiarias entre 1.000 e 7.000 euros por proxecto.
Os municipios que poden solicitar a subvención son Becerreá, Cervantes e Navia de Suarna, no caso dos Ancares Lucenses; e Abadín, Alfoz, Baralla, Begonte, Castro de Rei, Castroverde, O Corgo, Cospeito, Friol, Guitiriz, Guntín, Láncara, Lugo, Meira, Mondoñedo, Muras, Ourol, Outeiro de Rei, O Páramo, A Pastoriza, Pol, Rábade, Riotorto, O Valadouro, Vilalba e Xermade, en caso de Terras do Miño.
