A presidenta provincial do PP de Lugo, Elena Candia, ratificou este mércores publicamente o seu apoio ao vicepresidente primeiro da Xunta e líder provincial dos populares en Pontevedra, Alfonso Rueda, para suceder a Alberto Núñez Feijóo tanto á fronte da Xunta como do partido.

“Creo na súa experiencia de xestión e na súa experiencia orgánica”, aseverou Candia, quen ata agora se mantivo en silencio e que dá un paso á fronte para apoiar expresamente a Rueda un día despois de que o fixese Manuel Baltar. A dirixente lucense asegura que trasladou a súa opinión tanto a Feijóo como ao propio Alfonso Rueda. “Se decide dar o paso, eu estarei ao seu lado e tamén o votarei na sesión de investidura cando chegue o momento”, sentenciou.

SILENCIO NA CORUÑA

O líder provincial coruñés, Diego Calvo, declinou polo momento facer un pronunciamento público en relación á proposta dunha vía de unidade encabezada por Rueda que Feijóo abordou en días pasados cos principais dirixentes do partido.