O Ministerio de Transportes, Mobilidade e Axenda Urbana (Mitma) adxudicou, por un importe de 8,4 millóns de euros, as obras de adecuación ao Real Decreto 635/2006 dos túneles de Neira, San Pedro, Doncos e Cereixal, na autovía A-6, na provincia de Lugo.
Dita actuación, segundo informa, enmárcase nas previsións do Plan de Recuperación, Transformación e Resiliencia para mellorar as condicións de seguridade e viarias da Rede de Estradas do Estado.
O Real Decreto 635/2006, de 26 de maio, sobre requisitos mínimos de seguridade nos túneles de estradas do Estado, establece a transposición da Directiva 2004/54/CE do Parlamento Europeo e do Consello, de 29 de abril de 2004, sobre requisitos mínimos de seguridade para túneles da rede transeuropea de estradas.
Esta actuación, engade, responde á necesidade de adaptar os túneles da Rede de Estradas do Estado á citada normativa nos termos de equipamentos e instalacións de seguridade que o desenvolvemento actual das infraestruturas de transporte esixe.
Sobre estas obras, a subdelegada do Goberno en Lugo, Isabel Rodríguez, remarca que responden á necesidade de adaptar os túneles “á normativa europea en termos de equipamento e instalación de seguridade”.
