Un home foi detido pola Policía Nacional acusado de atropelar a un axente da Policía Local de Lugo que participaba nun control rutinario o pasado 2 de febreiro. O arrestado é un veciño de Lugo que conta, segundo relata a Policía Nacional nun comunicado emitido este xoves, con “innumerables” antecedentes.
O relato policial sostén que o detido arroiou a un axente ao darse á fuga tras recibir o alto nun control rutineiro. O policía evitou ser atropelado apoiando as mans sobre o capó do coche. Tras isto, iniciouse unha fuga na que o individuo subiu ás beirarrúas e puxo en “grave risco” a viandantes e outros condutores. Nun punto, abandonou o coche coas portas abertas e fuxiu a pé do lugar en dirección á rúa Conde.
Nese momento os axentes perderon a pista ao home, que foi identificado tras as pesquisas policiais, centradas no vehículo que, con todo, figuraba a nome dunha terceira persoa. Finalmente, o individuo foi localizado o pasado luns e axentes da Policía Nacional procederon ao seu arresto. Impútaselle un delito de desobediencia e outro contra a seguridade viaria.
