Axentes da Policía Local de Lugo foron mobilizados na tarde deste pasado mércores pola morte dunha muller de 54 anos de idade nunha vivenda da capital luguesa, supostamente por causas naturais.
Segundo informou a Policía Local, durante a tarde do mércores pasado axentes municipais trasladáronse a un piso da rúa Yáñez Rebolo onde, segundo a información recibida na Sala do 091, falecera unha persoa.
Unha vez no lugar, os axentes comprobaron que persoal sanitario do 061 tentaba reanimar a unha muller de 54 anos que, segundo a persoa que a acompañaba, tombouse a durmir unha sesta e “tardaba moito en espertar”, polo que requiriu auxilio de persoal sanitario.
As mesmas fontes policiais sinalaron que o persoal sanitario finalmente comunicou o falecemento da muller, supostamente por causas naturais, “aínda que o corpo policial competente continúa coas investigacións”.
