Os casos activos continúan en ascenso en Galicia e superan este domingo a barreira dos 70.000 —72.441, concretamente–, mentres que os novos contaxios baixan dos 8.000 e quedan nos 7.838 –776 menos nas últimas 24 horas–. A presión hospitalaria tamén se incrementa con 569 hospitalizados, 30 máis que na última xornada. A taxa de positividade, pola súa banda, continúa en descenso e marca un 21,8%.
Segundo os datos actualizados na mañá deste domingo pola Consellería de Sanidade con rexistros ata as 18,00 do sábado, baixan a 54 as persoas ingresadas en UCI pola Covid-19 en Galicia –dúas menos–, pero ascenden a 515 as hospitalizadas noutras unidades –32 máis–. Por áreas sanitarias, a presión hospitalaria sobe en todas, menos na Coruña. Así, concretamente en Lugo, son seis os ingresados en críticos –un máis– e 57 en planta –cinco máis–.
CASOS ACTIVOS
Os casos activos manteñen a tendencia ascendente e a área de Lugo suma 333 máis ca na xornada anterior, ao rexistrárense 848 novos contaxios nas últimas 24 horas mediante PCR ou probas de antíxenos. No resto de áreas, o maior incremento corresponde á de Vigo (+1.158), seguida da da Coruña e Cee (+611), Pontevedra e O Salnés (+407), Lugo (+333), Santiago (+123), Ourense (+59) e Ferrol (+33). Desta maneira, a área lucense conta cun total de 7.547 casos.
