O secretario provincial da Confederación Intersindical Galega (CIG) en Lugo, Toño Niño, reclamou á Xunta de Galicia que faga “todo o posible” para evitar o peche da empresa láctea Tegestacín, que se sitúa sobre a antiga factoría de Leite Pascual no concello de Outeiro de Rei.
Niño confirmou que a “empresa comunicou as súas intencións nunha reunión co comité de empresa, de pechar a factoría a curto prazo” e o despedimento dos seus 70 traballadores. Tras iso, o sindicato nacionalista convocou unha asemblea, na que se informou ao persoal dos plans da compañía e na que se puxo de manifesto a “oposición” a que se execute un ERE. “É paradoxal porque é a terceira vez que esta factoría pasa por esta situación e por iso imos pedir a implicación da Xunta de Galicia, da consellería de Medio Rural”, sostivo.
“No país onde máis leite se produce de Europa pechamos as fábricas de transformación que temos e iso é algo inexplicable. A administración terá algo que dicir”, soltou. O dirixente sindical asegurou que Tegestacín “de momento non xustificou ningunha causa para o peche” e considerou necesario “garantir a viabilidade da factoría e que a administración busque alternativas”.
Aínda que non se fixo “oficial” o peche e non se presentou a “documentación”, ao sindicato trasladóuselle “que non teñen a rendibilidade esperada, que é un proxecto que non é viable”. “É un grupo que ten un comportamento bastante especulativo. Para nada acredítanse as circunstancias que obriguen a un peche. Non hai unha explicación máis profunda. Estamos á espera de que entreguen a documentación oportuna”, afeou Toño Niño.
A empresa debe varias mensualidades aos 70 traballadores e agora atópase totalmente “inoperativa” dado que hai dúas semanas cortóuselle a luz por falta de pago.
