A empresa Tegestacín, que opera as antigas instalacións de Leite Pascual en Outeiro de Rei, trasladou aos traballadores a súa intención de pechar a planta coa consecuente perda dos 70 postos de traballo da factoría.
Diso informou a central nacionalista CIG que, nun comunicado, sostén que a compañía informou os representantes dos traballadores da súa intención de pechar a factoría “nun curto espazo de tempo”.
O sindicato incide en que aínda non existe un anuncio formal por parte da dirección da compañía sobre cando pretende levar a cabo o peche, que levaría a extinción dos 70 empregos da fábrica.
A CIG cualifica de “altamente preocupante” a intención da empresa xa que, ademais dos postos de traballo directos, suporía “un gran impacto” na economía dos concellos limítrofes.
Así, recela dos motivos que poidan existir detrás da intención da compañía que, como lembran, xa planeou sobre o futuro da planta noutras ocasións.
