O reitor da Universidade de Santiago, Antonio López, e o presidente da Deputación de Lugo, José Tomé Roca, subscribiron este xoves un acordo de colaboración para a actualización, análise, mantemento e mellora da ‘Enquisa de Infraestruturas e Equipamentos Locais’ (EIEL) da provincia. Deste xeito, a institución provincial compromete unha achega de 91.000 euros en dúas anualidades, mentres que a USC farase cargo duns 8.000 euros.
A EIEL representa un inventario estatal dos servizos de todos os municipios con menos de 50.000 habitantes e é o instrumento básico de valoración das necesidades destas administracións en relación á cooperación económica local do Estado. Os datos que se obteñan serán enviados ao grupo de traballo da EIEL do Ministerio de Política Territorial e Función Pública.
Ambas as institucións, Deputación e USC, destacaron o compromiso mutuo para favorecer o desenvolvemento equilibrado e sustentable dos municipios da provincia a través do diagnóstico dos posibles desequilibrios existentes en infraestruturas e equipos.
O encargado de desenvolver estas accións será o Laboratorio do Territorio da Escola Politécnica Superior de Enxeñaría do Campus Terra.
