A Policía Local de Lugo identificou aos dous responsables de senllas festas en vivendas desta cidade despois de queixas de veciños polo ruído que lles impedía o descanso.

Segundo informou a Policía Local, sobre as 23,45 horas do 7 de decembro unha patrulla do Grupo Operativo Nocturno foi enviada a un edificio da Rolda das Fontiñas porque se recibiron queixas de veciños por ruídos procedentes dunha vivenda.

Os axentes desprazados escoitaron desde a escaleira do piso inferior ruído de voces e xentes que saía dunha vivenda e a porta do domicilio aberta, onde observaron a presenza de varios mozos e botellas de alcol e vasos.

Os axentes procederon á identificación do responsable, quen manifestou que celebraba unha festa con amigos, indican as mesmas fontes policiais, polo que se lle requiriu para que cesasen as molestias, o que fixo ao instante.

Deste xeito, a vivenda foi desaloxada e a Policía Local de Lugo tramitou acta de denuncia por infracción á Ordenanza de Protección Ambiental.

Posteriormente, sobre as 1,15 horas deste 8 de decembro unha patrulla da Policía Local acudiu a un inmoble da rúa Río Lor porque veciños se queixaban dos ruídos procedentes dunha vivenda na que levaba a cabo unha festa, indicaron as mesmas fontes.

Os axentes desprazados comprobaron que “se escoitaban ruídos de actividade humana en ton elevado e da televisión que estaba a volume moi alto que perturbaba o descanso dos veciños”, abundaron as mesmas fontes policiais.

Por iso, os policías identificaron ao responsable, ao que se lle ordenou que cesasen as molestias, o que fixo ao instante, destaca a Policía Local, tras o que se tramitou acta de denuncia por infracción á Ordenanza de Protección Ambiental.