Axentes da Policía Local de Lugo detiveron a un home por un suposto delito de violencia machista despois de agredir á súa parella tras unha discusión nunha vivenda da cidade. Segundo informou a Policía Local, sobre as 00,05 horas do pasado 7 de decembro unha patrulla do Grupo Operativo Nocturno foi enviada a unha vivenda da rúa Lamas de Prado porque unha muller supostamente fora agredida pola súa parella.

Os efectivos desprazados atoparon a unha moza “moi nerviosa”, destacaron as mesmas fontes policiais, quen lles manifestou que tivera unha “forte discusión” coa súa parella e, nun momento, agrediuna “agarrándoa dos pelos, zarandeándoa e tirándoa ao chan”, concretan as mesmas fontes. A muller engadiu que, unha vez no chan, propináralle “varias patadas”.

Os axentes acharon no domicilio ao home, quen lles manifestou que tivera unha “forte discusión” coa súa parella e, sinalan as mesmas fontes, presentaba un arañazo no brazo.

Por estes feitos, procedeuse á detención do home por un suposto delito de violencia machista e foi trasladado inicialmente a un centro sanitario e, posteriormente, a dependencias policiais, onde se instruíron dilixencias para o xulgado competente.

Pola súa banda, a vítima foi conducida a un centro sanitario e, posteriormente, levada a dependencias policiais, onde formalizou a denuncia polos feitos.